Hacıbəy Heydərli: Gələcəyin mediasında əsas dəyər etibar və inam olacaq

CƏMİYYƏT

18.09.2026, 17:00

Xəbərlərimizi Google-da izləyin

Yeniliklərdən dərhal xəbərdar olun

Bu gün media nümayəndələri, jurnalistlər yalnız informasiya yayıcısı kimi deyil, eyni zamanda zamanın ən böyük problemlərindən olan dezinformasiya və saxta xəbərlər ilə mübarizə aparan rolunda da fəal olmalıdır.

Oxu24.com xəbər verir ki, bunu İsmayıllıda Baş Prokurorluğun təşkilatçılığı ilə keçirilən "Müasir çağırışlar fonunda dövlət, media və vətəndaş cəmiyyəti əməkdaşlığı" mövzusunda konfransda Mətbuat Şurası İdarə Heyətinin üzvü Hacıbəy Heydərli deyib.

O qeyd edib ki, cəmiyyətin hər bir fərdi media savadlılığına yiyələnməlidir:

"Sosial şəbəkələrin sayəsində feyk xəbərlər, dezinformasiyalar bəzən bir neçə saat ərzində milyonlarla insana çata bilir. Yanlış məlumatın yayılması üçün saniyələr kifayətdir, amma həmin məlumatın yaratdığı yanlış təsəvvürü aradan qaldırmaq günlər, hətta həftələr tələb edə bilər. Bu baxımdan da dövlətimiz tərəfindən media savadlılığı layihəsi həyata keçirilir. Cəmiyyətimiz media savadlılığına yiyələnməlidir ki, bu tip məlumatlara aldanmasın".

H. Heydərli süni intellektin mediaya təsiri haqda da danışıb:

"Süni intellekt media üçün böyük imkanlar yaradır. Jurnalist işini sürətləndirir, məlumatların təhlilinə kömək edir, yeni kontent formalarının yaranmasına şərait yaradır. Amma digər tərəfdən, süni intellektlə hazırlanmış saxta görüntülər, səslər və videolar - deepfake texnologiyaları - informasiya mühitində etimad problemini daha da dərinləşdirə bilər".

O qeyd edib ki, dövlət, media və vətəndaş cəmiyyətinin birlikdə hərəkət etməlidir:

"Gələcəyin mediasında əsas dəyər yalnız sürət və operativlik olmayacaq. Əsas dəyər etibar və inam olacaq. Bu mübarizədə dövlət, media və vətəndaş cəmiyyətini birlikdə hərəkət etməlidir.

Dövlət, media və vətəndaş cəmiyyəti bir-birinin alternativi deyil, eyni informasiya ekosisteminin fərqli və vacib tərəfləridir. Bu əməkdaşlığı nə qədər gücləndirsək, cəmiyyətimiz yanlış məlumatlara qarşı bir o qədər dayanıqlı olacaq".

Həmçinin oxuyun