Azərbaycanda pensiyalarla bağlı yeni qərar gözlənilir:iqtisadçı mühüm detallardan DANIŞDI

CƏMİYYƏT

21885

22.06.2026, 19:29

Pensiya islahatlarında mühüm addım: Qadınların pensiya yaşı kişilərlə eyniləşir

Azərbaycanda pensiya islahatları çərçivəsində müəyyən edilmiş keçid dövrü növbəti mühüm mərhələyə qədəm qoyur. "Əmək pensiyaları haqqında" Qanuna əsasən, ölkədə qadınların pensiya yaşı hər il 6 ay artırılaraq kişilərin pensiya yaşı ilə bərabərləşdirilir. Bu prosesin davamı olaraq, 2026-cı il iyulun 1-dən etibarən qadınların da pensiya yaşı 65-ə çatacaq. Beləliklə, Azərbaycanda qadınlar və kişilər üçün yaşa görə əmək pensiyasına çıxma yaşı tamamilə eyniləşəcək.

Bəs qadın və kişilər üçün pensiya yaşının eyniləşdirilməsi hansı zərurətdən irəli gəlir? Bu dəyişiklik əmək bazarına və məşğulluğa necə təsir göstərə bilər?

Mövzu ilə bağlı Oxu24.com-un suallarını iqtisad üzrə fəlsəfə doktoru, İqtisadi Resursların Öyrənilməsi Mərkəzinin sədri Ruslan Atakişiyev cavablandırıb.

Ruslan Atakişiyev qeyd edib ki, hazırda həm qadınlarda, həm də kişilərdə pensiya yaşının 65-ə çatdırılması prosesi müşahidə olunur. Ekspertin sözlərinə görə, bu yanaşmanın əsas mahiyyəti ondan ibarətdir ki, pensiya yaşı nə qədər aşağı olarsa, pensiya yaşındakı şəxslərə müavinətlərin ödənilməsi və digər sosial müdafiə məsələləri dövlət büdcəsi üçün bir o qədər böyük yük hesab edilir.

Bununla belə, beynəlxalq təcrübəyə diqqət yetirməyin vacibliyini vurğulayan R.Atakişiyev bildirib:

“Biz beynəlxalq təcrübəyə baxsaq görərik ki, həmin şəxslərin işləyən vaxtı yığılan kapitalları və pensiya yaşına çatdıqdan sonra istifadə etdikləri vəsaitlər, özü əlavə olaraq ümumi daxili məhsulun (ÜDM) genişlənməsinə köməklik göstərir. Yəni burada həmin insanlara pullu xidmətlərin, turizm xidmətlərinin, müalicə-sanatoriya xidmətlərinin göstərilməsi əlavə gəlir imkanları yaradır".

İqtisadçı ölkəmizdə sosial təminat sisteminin daha da təkmilləşdirilməsi üçün özəl pensiya fondlarının yaradılmasının vacibliyinə toxunub. O bildirib ki, Azərbaycanda özəl pensiya fondlarının inkişafına geniş şəkildə ehtiyac var. Bu, əhalinin təkcə icbari pensiyalarla kifayətlənməməsinə, həm də özəl pensiya fondlarının imkanlarından geniş şəkildə istifadə etməsinə şərait yarada bilər. Ekspertin fikrincə, belə bir sistemin qurulması həm də iqtisadiyyat üçün əlavə bir investisiya mənbəyinin formalaşması deməkdir.

Ruslan Atakişiyev vurğulayıb ki, ümumilikdə pensiya məsələsinə və təqaüd yaşına çıxma prosesinə qabaqcıl beynəlxalq təcrübəyə, bazar prinsiplərinə uyğun müasir və mütərəqqi metodların tətbiq edilməsi olduqca vacibdir. Bu metodların sistemli şəkildə tətbiq olunması gələcəkdə mühüm islahatlara yol aça bilər:

“Pensiya sistemində mütərəqqi metodların sistemli olaraq tətbiq edilməsi imkan verər ki, gələcəkdə artıq orta götürülmüş pensiya yaşının həddi aşağı salınsın".

Çimnaz Telmanqızı

Həmçinin oxuyun