Siqaretin zərərləri demək olar ki, hamıya bəllidir. Lakin bir çoxu zərərli olsa da tütün məmulatlarına maraq göstərib aludə olur. Nadir hallarda siqaret istifadəçiləri siqareti çəkib bitirdikdən sonra onu atmaq üçün qutu axtarır. Əksərən isə kötükləri ya ayaq altına atıb əzir, ya da kənara tullayır. Bu xüsusən də küləkli hava şəraitində fəlakətlə nəticələnə bilər.

OXU24.COM  xəbər verir ki, bu gün paytaxtda şiddətli külək var. Belə havalarda siqaret çəkənlərin diqqətsizliyi ciddi fəsadlara səbəb ola bilər.

Küçədə siqareti söndürmədən yerə tullamaq mədəniyyətsizlik olduğu kimi həm də təhlükəlidir. Sönməmiş köz küləyin təsiri ilə yanğına çevirə bilər.

Qeyd edək ki, sürücülər çox vaxt avtomobildən sönməmiş siqaret kötüyünü yola atırlar.

Xatırladaq ki, İnzibati Xətalar Məcəlləsinin 212.4-cü maddəsinə görə siqaret kötüklərinin ətrafa atılmasına görə, şəxslər 50 manat məbləğində cərimə edilir.