Sevgilisini öldürməkdə, onun anasını isə ağır yaralamaqda ittiham edilən Sabir Qədimovun məhkəməsi prosesi etdirilib.
 
Bakupost.az-ın məlumatına görə, Bakı Ağır Cinayətlər Məhkəməsində hakim Rasim Sadıxovun sədriliyi ilə keçirilən prosesdə Sabir Qədimov dindirilib.
 
O bildirib ki, mərhumla hərbi xidmətdə olan zaman tanış olub: "Aytənlə feysbukda tanış olmuşdum. İsti münasibətimiz yaranmışdı. Əsgərlikdən qayıtdım, görüşməyə başladıq. Fikrim ciddi idi. Onunla bir neçə dəfə cinsi münasibətdə olmuşam. Evlənmək məqsədim vardı”.
 
Təqsirləndirilən qeyd edib ki, Aytənə qohumları elçi gedib: "Bibim dedi ki, üzük istəyirlər. Sonra mən də Aytən zəng elədim.  Məni söydü, mən də ona qarşılıq verdim. Dözmədim, əvvəldən tapdığım silahla evlərinə getdim. Qızı vurdum, anası qabağıma keçdi. Anasına vurmaq fikrim yox idi”
 
Sabir Qədimov deyib ki, Aytənin bakirəliyini o pozmayıb. Bu zaman zərərçəkmişin ailəsi ilə təqsirləndirilən şəxs mübahisə edib.
 
Proses aprelin 19-da davam etdiriləcək.
 
Qeyd edək ki, qətl ötən il Sabunçu rayonunun Balaxanı qəsəbəsində baş verib.
 
Balaxanı qəsəbə sakini, 1999-cu il təvəllüdlü Sabir Qədimovun ailəsi Cəfərovlar ailəsinin 2001-ci il təvəllüdlü qızı Aytən Cəfərovaya elçi gəlib.
Elçilik məclisindən sonra S.Qədimov A.Cəfərovanın yaşadığı evə gələrək onunla mübahisə edib. Mübahisədən sonra o, babasına məxsus ov tüfəngini götürərək A.Cəfərovanın yaşadığı evə gəlib.
 
S.Qədimov tüfənglə fərdi yaşayış evinin həyətində A.Cəfərovanın başına və bədəninə atəş açıb. Onun qarşısını almaq istəyən A.Cəfərovanın anası, 1962-ci il təvəllüdlü Esmira Cəfərova əlindən və çiynindən güllə yarası alıb.
 
Yaralılar 3 saylı Kliniki Tibbi Mərkəzə yerləşdirilib. E.Cəfərova sağ yanağından, sağ çiynindən və sağ ayağından güllə yaraları alıb. Cərrahi əməliyyatla onun həyatını xilas etmək mümkün olub. E.Cəfərovanın sağ əlinin üç barmağı travmatik amputasiya edilib.
 
A.Cəfərova isə kəllə və döş qəfəsinin arxa səthindən aldığı güllə yaralarından dünyasını dəyişib.
 
Faktla bağlı Cinayət Məcəlləsinin 120.1-ci (qəsdən adam öldürmə) və 29, 120. 2.7-ci (iki və ya daha çox şəxsi öldürməyə cəhd) maddələri ilə ittiham irəli sürüllüb. Oxu24.com