“Suriya mövzusunda BMT səviyyəsində siyasi həll yolu istəyirik. Hərbi variantı qətiyyən qəbul etmirik”.

Publika.az xəbər verir ki, bunu ABŞ-ın Suriya üzrə xüsusi nümayəndəsi Ceyms Ceffri Ankarada təşkil edilən “Beynəlxalq İdlib Konfransı”nda deyib.

Türkiyə-Rusiya liderlərinin zirvə görüşündən saatlar əvvəl danışan Ceffri rəsmi Vaşinqtonun Ankaraya dəstək vermə məsələsini müzakirə etdiyini dilə gətirib və Suriyada 21-ci əsrin faciəsinin yaşandığını bildirib.

“Suriyada daha əvvəl kimyəvi silahdan istifadə olunduğunu gördük. Bu, sadəcə BMT qərarlarının və beynəlxalq hüququn pozulması demək deyil. Kütləni məhv edən silahların istifadəsindən də böyük problemdir. İdlib artıq Suriya ixtilafının mərkəzinə çevrilib”, - Ceffri qeyd edib.

O, Türkiyə Prezidenti Rəcəb Tayyib Ərdoğanla ABŞ lideri Donald Trampın Suriya mövzusunda görüşünün gündəmdə olduğunu açıqlayıb.

Qeyd edək ki, konfransa Prezidentlə Əlaqə Komitəsinin sədr müavini Çağatay Özdemir, Suriya Milli Komissiyasının sədr müavini Dima Moussa, Türkiyə prezidentinin baş müşaviri Gülnur Aybet qatılıb.