Rusiyanın xarici işlər naziri Sergey Lavrov Şimali Koreyaya iki günlük səfərə gəlib.

Oxu24.com xəbər  verir  ki,bu barədə RİA Novosti məlumat yayıb.

Nazirin təyyarəsi çərşənbə günü, oktyabrın 18-də yerli vaxtla axşam saatlarında Pxenyan hava limanına enib. Qeyd olunur ki, leysan yağışa baxmayaraq, Lavrovu iki yüzə yaxın KXDR vətəndaşı milli geyimdə gül-çiçəklə qarşılayıb.

İki günlük səfər çərçivəsində Lavrovun Şimali Koreyanın xarici işlər naziri Çoi Sonq Hui ilə danışıqlar aparması planlaşdırılır. Lavrov sonuncu dəfə KXDR-ə 2018-ci ilin may ayının sonunda səfər edib, ondan əvvəl nazir 2009 və 2004-cü illərdə Pxenyana səfər edib.

Oktyabrın 17-də Rusiya prezidentinin mətbuat katibi Dmitri Peskov Şimali Koreyadan Rusiya ordusu üçün silah tədarükü ilə bağlı bəyanatları əsassız adlandırıb. Onun sözlərinə görə, Şimali Koreya Rusiyanın ən yaxın qonşusudur və Moskva ən yaxın qonşusu ilə qarşılıqlı hörmətə əsaslanan qarşılıqlı faydalı münasibətlər qurmağa davam edəcək.

O, tərəflərin bütün sahələrdə əlaqələri inkişaf etdirəcəyini vurğulayıb.

Müəllif: Nigar