Azərbaycanın sabiq Baş naziri Surət Hüseynov vəfat edib.
 

Oxu24.com-un məlumatına görə, uzun sürən xəstəlikdən sonra mərhumun mədəsində deşilmə yaranıb və bu səbəbdən başlayan qanaxma nəticəsində o həyatını itirib.

Qeyd edək ki, Surət Hüseynov 1959-cu ildə Gəncədə anadan olub. O, 1993-cü ildə Azərbaycanda baş vermiş Gəncə qiyamına rəhbərlik edib. Həmin vaxt korpus komandiri olan S.Hüseynov Milli Qəhrəman adına da layiq görülüb. Surət Hüseynov 1993-cü il iyununda Baş nazir təyin olunub. 2 il sonra – 1995-ci ildə daha bir dövlət çevrilişinə cəhddə ittiham edilərək vəzifəsindən azad olunub.
Azərbaycanı tərk edən sabiq Baş nazir 1997-ci ildə Rusiyada saxlanılaraq ölkəyə gətirilib və 1999-cu ilin fevral ayında məhkəmənin qərarı ilə ömürlük həbs cəzasına məhkum edilib. 2004-cü il martın 17-də isə Prezident İlham Əliyevin əfv fərmanı ilə həbsdən azad olunub. Həbsdən çıxdıqdan sonra Surət Hüseynov Azərbaycanda yaşamırdı.