ABŞ-nin keçmiş prezidenti Donald Tramp 2021-ci ildən bəri Mar-a-Laqo malikanəsində saxlanılan qədim keramika neft lampaları və sikkələrin İsrailə qaytarılmasına razılıq verib.

OXU24.COM Trend-ə istinadən xəbər verir ki, bu barədə "The Wall Street Journal" məlumat yayıb.

"Bu əntiq əşyalar təşkilatın tam dəstəyi ilə İsrail Qədim Əşyalar İdarəsinin nümayəndəsi tərəfindən bağışlanıb. Əsərləri əvvəlcədən planlaşdırıldığı kimi sərgilədiyimiz üçün onların təşkilatın nümayəndəsinə qaytarılmasını sürətləndirəcəyik", - Trampın adı açıqlanmayan sözçüsü deyib.

2019-cu ildə amerikalı iş adamı və respublikaçı donor Saul Foks və İsrail Qədim Əşyalar İdarəsinin rəhbəri İsrael Hasson İsraili dəstəklədiyinə görə minnətdarlıq əlaməti olaraq Donald Trampa keramika lampalar və qədim sikkələr vermək qərarına gəlib. Onlar bir neçə həftə yəhudilərin Hanukka bayramı üçün Ağ Evdə artefaktları nümayiş etdirmək və sonra onları İsrailə qaytarmaq niyyətində idilər.

Saul Foks qəzetə deyib ki, lampalar Vaşinqtonda olub, lakin Ağ Evə çatmayıb. Onun sözlərinə görə, Dövlət Departamentinin əməkdaşları onları yoxlamaq üçün aparıblar və Hanukkadan sonra geri qaytarmağa vaxtları olmayıb.

Bildirilib ki, Foks Vaşinqtondan Kaliforniyadakı evinə artefakt çatdırmaq üçün kuryer tutub. Lakin koronavirus pandemiyası lampaların yerinə qaytarılmasının qarşısını alıb.

2021-ci ilin sonlarında Foks Hanukka şam yeməyi üçün Trampın Mar-a-Laqo malikanəsini ziyarət edib. Bu vaxt artıq İsrail Qədim Əşyalar İdarəsinin rəhbəri olmayan Foks, Hasson və İsrail Qədim Əşyalar İdarəsinin yeni rəhbəri Eli Eskosido artefaktları Trampa təhvil vermək planı hazırlayıblar.

Foks Trampın malikanəsindəki tədbirə gəlib və özü ilə bir qutu artefakt gətirib. Sandığın üzərində "İsrailin milli sərvətlərindən olan qədim əşyalar" yazısı qeyd edilib və Tramp bunu "dərin minnətdarlıq" əlaməti kimi qəbul edib. İş adamı Eskosidonun ən qısa zamanda İsrailə qaytarılmasını tələb etməsinə baxmayaraq, eks-prezidentə artefaktları təqdim edib.

Foksun sözlərinə görə, müqavilədə heç vaxt keramika lampalarının vətənlərinə qaytarılma tarixi göstərilməyib. Daha sonra İsrail Foks ilə əlaqə saxlamağa başlayıb və Trampın mühafizəçi kimi çıxış etdiyi artefaktların geri qaytarılmasını istəyib. Bundan əlavə, İsrail Qədim Əşyalar İdarəsi qədim əşyaların geri qaytarılması üçün ictimai kampaniyaya başlayıb.