Məlum olduğu kimi, ötən günlərdə Rusiyada muzdlu hərbi qrup olan “Vaqner” rəhbərliyə üsyan edərək dövlət çevrilişinə cəhd göstərib. Rusiya lideri Putin 25 minlik ordusu ilə Moskvaya doğru yürüş edən "Vaqner"i xəyanətdə günahlandırıb. Tərəflər sonda razılığa gəliblər. Belarus lideri Aleksandr Lukaşenkonun vasitəçiliyi ilə Priqojinin yürüşü başa çatıb. Priqojin "rus qanını tökməmək məsuliyyəti ilə" geri çəkildiklərini açıqlayıb.

Oxu24.com xəbər verir ki, Kreml və Rusiya Müdafiə Nazirliyi itkilərlə bağlı susmağa üstünlük versə də, ordu mənbələrinə istinadən məlumatlar yayımlanan “Rybar” və “Fighterbomber” telegram kanalları araşdırma aparıb.

Araşdırmaların nəticələrinə görə, Rusiya ordusunun bütün itkiləri hava qüvvələrindəndir və ümumilikdə 7 təyyarə vurulub. Bildirilib ki, “Vaqner” qüvvələri 6 helikopteri, həmçinin hava komandanlığı mərkəzi kimi istifadə edilən İL-22M təyyarəsini vurub.

İl-22M təyyarəsinin vurulması zamanı azı 10 zabitin həlak olduğu təxmin edilir. Vurulan helikopterlərin KA-52 hücum, Mi-8 və Mi-35M döyüş helikopterləri olduğu, bundan başqa, elektron döyüş maşınları ilə təchiz edilmiş üç Mi-8MTPR helikopterinin vurulduğu iddia edilib. Məlumatda Rusiya Hərbi Hava Qüvvələrinin verdiyi can itkisi 11-i pilot olmaqla 20 aviator zabiti olaraq göstərilib.