Hindistanın şimal-şərqindəki bölgələri vuran musson yağışları səbəbindən baş verən sel nəticəsində 1 nəfər ölüb, on minlərlə insan təhlükəsiz ərazilərə yerləşdirilib.

Oxu24.com xəbər verir ki,Assam əyalətinə təsir edən musson yağışları səbəbindən bölgədə qırmızı xəbərdarlıq elan edilib, sel təhlükəsi olan kənd və qəsəbələrdə yaşayan insanlar təxliyə edilib.

Assam Fəlakət İdarəsi tərəfindən edilən açıqlamada, pis hava şəraitinin və daşqınların 500 minə yaxın insanın zərər çəkdiyi qeyd edilib.

Bölgədə leysan yağışlar və daşqınlarla mübarizə üçün əyalətdəki 31 rayondan 20-də açılan 83 düşərgəyə təxminən 14 min insan yerləşdirilib.

Assam və Sikkim əyalətlərinin müxtəlif yerlərində güclü yağışlar səbəbindən torpaq sürüşmələri baş verib, Meqhalaya ştatında isə sellər böyük bir stadionun çöl hissəsini dağıdıb və çoxlu park edilmiş avtomobillərə ziyan vurub.

İqlim böhranı bölgədə nizamsız yağışlara səbəb olur

Ötən ilin iyun ayında yağan güclü yağışlar nəticəsində Assam əyalətində baş verən sel 108 kəndi su altında qoyub, kəndlərdə yaşayan 115 mindən çox insanı köçkün vəziyyətinə salıb.

Hər il iyun-sentyabr aylarında baş verən musson yağışları bölgəyə böyük ziyan vurur.

Alimlər son illər Banqladeşdə və Hindistanın şimal-şərq bölgələrində baş verən nizamsız və həddindən artıq yağıntıların iqlim dəyişikliyi ilə bağlı olduğu fikrini bölüşürlər.

Tərcümə: Nigar