“AzInTelecom” şirkəti rəqəmsal sahədə dünyanın lider şirkətlərindən hesab olunan Hindistanın “Tech Mahindra” şirkəti ilə əməkdaşlıq müzakirələrinə başlayıb.

Oxu24.com xəbər verir ki, ötən gün “Tech Mahindra”nın birinci vitse-prezidenti Sandip Phadkenin başçılıq etdiyi nümayəndə heyəti Bakıda “AzInTelecom”un İdarə Heyətinin rəhbəri Elxan Əzizov tərəfindən qəbul edilib. 

Görüşdə “AzInTelecom”un rəhbər heyəti ilə yanaşı, İnnovasiya və Rəqəmsal İnkişaf Agentliyinin sədr müaivini Lukas Tzitzis də iştirak edib. Görüş zamanı əməkdaşlıq və tərəfdaşlıq üçün potensial imkanlar müzakirə olunub. Rəqəmsal transformasiya, Əşyaların İnterneti (IoT), bulud hesablamaları və digər məsələlər barəsində diskussiya aparılıb.

Qeyd edilib ki, görüş Azərbaycan bazarının potensialını maraqlı tərəflərə nümayiş etdirmək üçün fürsət olacaq.

Müzakirələrdə “Tech Mahindra” şirkəti ilə Azərbaycan arasında yeni tərəfdaşlıq imkanları yaradan və iki tərəf arasında bilik və texnologiyanın ötürülməsini asanlaşdıracaq uzunmüddətli əməkdaşlıq qurula biləcəyi vurğulanıb. Bulud xidmətləri üzrə birgə əməkdaşlıq perspektivlərini müzakirə edən tərəflər görüşün səmərəli müzakirələrə və hər iki tərəf üçün faydalı əməkdaşlığa yol açacağına əminliyini ifadə edib.