İran və Səudiyyə Ərəbistanı arasında əldə olunan normallaşma razılaşması çərçivəsində İranın Ər-Riyaddakı səfirliyi 7 ildən sonra iki ölkə rəsmilərinin də iştirak etdiyi rəsmi mərasimlə yenidən açılıb.

Oxu24.com xarici mediaya istinadən xəbər verir  ki,mərasimdə İran Xarici İşlər Nazirliyinin konsulluq işləri üzrə müavini Əli Rza Beqdeli və İranın Ciddədəki müvəqqəti nümayəndəsi Həsən Zərnağari iştirak ediblər.

Nazirliyin sözçüsü Nasser Kenani də Ciddədəki konsulluğun və İslam Əməkdaşlıq Təşkilatının (İƏT) daimi nümayəndəliyinin çərşənbə axşamı və çərşənbə günləri rəsmi olaraq açılacağını açıqlayıb.

2016-cı il yanvarın 2-də Səudiyyə Ərəbistanında şiə ruhanisi Nimr ən-Nimr də daxil olmaqla 47 nəfərin “terrorçuluq” ittihamı ilə edam edilməsindən sonra Səudiyyə Ərəbistanının Tehrandakı səfirliyi və Məşhəd şəhərindəki konsulluq binası yandırılıb. 

Ər-Riyad administrasiyası buna cavab olaraq İranla bütün diplomatik əlaqələri kəsmək qərarına gəlib. Martın 10-da Çinin paytaxtı Pekində keçirilən görüşdən sonra İran və Səudiyyə Ərəbistanı arasında 7 ildən sonra diplomatik əlaqələrin bərpası ilə bağlı razılıq əldə olunub.

Əldə edilən razılaşma çərçivəsində iki ay ərzində İran və Səudiyyə Ərəbistanı arasında diplomatik əlaqələrin bərpa ediləcəyi və iki ölkənin qarşılıqlı olaraq səfirlik və nümayəndəliklərini açacağı bildirilib.

Tərcümə: Miri Məcidli