Rusiya tərəfindən işğal olunmuş Ukraynanın Melitopol şəhərində partlayış səsləri eşidilib.

Oxu24.com  xəbər  verir   ki,  bu  barədə  şəhər   meri  İvan Fedorov Telegram-da bildirib.

"Şəhərin bütün rayonlarında bir anda bir neçə partlayış səsi eşidilir. İşğalçılar təlaş içindədirlər. Baş qərargahdan təfərrüatları gözləyirik", - o yazıb.

Eyni zamanda, müxtəlif mənbələr aerodrom ərazisində bir neçə güclü partlayışın baş verdiyini bildirdilər, lakin etibarlı təsdiq yoxdur.

Bir müddət sonra Rusiya mətbuatı şəhərin fövqəladə hallar xidmətinə istinadən xəbər verdi ki, partlayış  lokomotiv deposunda olub. Fövqəladə hallar xidmətinin məlumatına görə, depoda dağıntılar olsa da, tələfat yoxdur.

Rusların  öz bazalarını qurduqları Melitopoldakı hərbi aerodrom və lokomotiv deposu şəhərin şimal-qərb hissəsində bir-birindən uzaq deyil. BBC qeyd edir ki, zərbənin hansı vasitə ilə vurulduğu hələ məlum deyil.

Melitopolun işğalçı hakimiyyətinin fövqəladə hallar xidmətinin nümayəndələri bildiriblər ki, Ukrayna ordusunun işğal altında olan Melitopoldakı hədəflərə endirdiyi zərbədən sonra şəhərdə elektrik enerjisi kəsilib.

Tərcümə: Miri Məcidli