Polşa Daxili Təhlükəsizlik Agentliyi (ABW) Rusiyaya işləyən və ölkədə təxribat fəaliyyətinə hazırlaşan  casus şəbəkəsini ifşa  edib.

Oxu24.com xəbər  verir  ki,  bu barədə RMF FM məlumat yayıb.

İstintaq çərçivəsində ABW əməkdaşları 6 nəfəri saxlayıb, şəbəkə fəaliyyəti ilə əlaqədar dəmir yolu relslərində və milli əhəmiyyətli infrastrukturda həyəcan siqnalı verilib.

Saxlanılanlar Rusiya xüsusi xidmət orqanlarında işlədiyi güman edilən “şərq sərhədindən kənarda olan” əcnəbilərdir. ABW agentləri onları mühüm marşrutlarda və dəmir yolu qovşaqlarında relslərdə hərəkəti qeydə alan və görüntüləri şəbəkəyə ötürən gizli kameraların aşkarlanması ilə əlaqədar saxlayıblar.

RMF FM-ə daxil olan məlumata görə, söhbət ilk növbədə Podkarpakye Voyevodalığında - xüsusən də Rzeszov yaxınlığındakı Yasionets hava limanının yaxınlığında yerləşən dəmir yolu relslərinin hissələrindən gedir. Hava limanı Qərbin Ukraynaya göndərdiyi silah və sursatların əsas tranzit məntəqəsidir.

Polşanın digər yerlərində də kameralar quraşdırılıb.

Xüsusi əməliyyatla əlaqədar xidmətin əməkdaşları və polis yüksək döyüş hazırlığı vəziyyətinə gətirilib. Hüquq-mühafizə orqanlarının əməkdaşları Polşada strateji əhəmiyyətli dəmir yolu xətlərinin təhlükəsizliyinə xüsusi diqqət yetirir və mühüm mühüm infrastruktur obyektlərinin mühafizəsi də gücləndirilib.

Qeyd edək ki, son aylar Polşada bir neçə dəfə Rusiyaya işləməkdə şübhəli bilinən şəxslər müəyyən edilib. Yalnız bu ilin yanvarında casusluqda ittiham olunan rus və belarusluya qarşı iş ölkə məhkəməsinə göndərilib.

Tərcümə: Miri Məcidli