İş günlərinin sayının həftədə dördə endirilməsi işçilərin özlərini daha sağlam və xoşbəxt hiss etmələrinə səbəb olub.

Yeni bir araşdırmaya görə, həftədə 4 gün işləmək narahatlıq və stressi azaltmaqdan tutmuş yuxu və hərəkət üçün daha çox vaxt təmin etməyə qədər bir çox cəhətdən işçilərin sağlamlığını yaxşılaşdırır.

İngiltərədəki Kembric Universitetinin sosial elmlər professoru və işin psixoloji sağlamlığa təsirini araşdıran hesabatın həmmüəllifi Brendan Burçell (Brendan Burchell) sözügedən mövzu ilə bağlı deyib: "Akademik skeptisizmimizə baxmayaraq, bu, həqiqətən müsbət nəticə oldu. Sorğuda iştirak edən şirkətlərin yarıdan çoxu əsasən Böyük Britaniyada fəaliyyət göstərir. Onlar bütün işçilərinə bazar ertəsi və ya cümə günü istirahət verir, digərləri həftə ərzində növbəli cədvəl və ya daha qısa iş saatları ilə həll edirlər”.

Altı aylıq sınaq müddətində işçilərin orta həftəlik iş saatı 38-dən 34-ə düşüb.

SİA-nın əldə etdiyi məlumata görə, 4 günlük iş bir çox işçi üçün daha yaxşı sağlamlıq deməkdir.

İştirakçıların təxminən 40 faizi işlə bağlı daha az stress yaşadıqlarını, 71 faizi isə daha az tükənmişlik hiss etdiklərini söyləyib.

İşçilərin 40 faizdən çoxu psixi sağlamlıqlarının yaxşılaşdığını, qrupun əhəmiyyətli bir hissəsi isə narahatlıq və mənfi emosiyaların azaldığını bildirib.

İşçilərin təxminən 40 faizi pilot dövrdə fiziki sağlamlıqlarının daha yaxşı olduğunu söyləyib ki, bu da onların hobbilərinə, idmana, yemək bişirməyə, ailə və digər fəaliyyətlərə daha çox vaxt sərf etmələrinə görə sayılır.

İşçilərin təxminən yarısı təcrübədən əvvəlki qədər yorğun olmadıqlarını, 40 faizi isə daha rahat yata bildiklərini söyləyib.