Bakı-Quba yolunun Siyəzən rayonu ərazisindən keçən hissəsində yük avtomobilində yanğın baş verib.

OXU24.COM  AZƏRTAC-a istinadən bildirir ki, gecə saatlarında "Volvo" markalı tranzit yük avtomobilinin idarəetməni itirərək yol kənarındakı beton maneəyə çırpılması nəticəsində təkərində yanğın başlayıb.

Siyəzən Rayon Yanğından Mühafizə Hissəsinin qüvvələri dərhal əraziyə cəlb olunub. Yanğınsöndürənlərin müdaxiləsi nəticəsində yanğın qısa müddətdə söndürülərək avtomobilə keçməsinin qarşısı alınıb. Həmçinin təhlükəsizlik tədbirləri çərçivəsində avtomobilin yanacaq çənindən ətrafa dağılmış yanacaq yuyularaq yanğın təhlükəsi aradan qaldırılıb.