Rusiyada, Tümendə Maksim Qorki və Oktyabrın 50 illiyi küçələrinin kəsişməsində sərnişinlərlə dolu avtobus hərəkətdə olarkən yanıb.

OXU24.COM bildirir ki, bu barədə Fövqəladə Hallar Nazirliyinin regional idarəsi xəbər verib.

"Bizim şəhər Tümen" Telegram kanalında yayımlanan videonu hadisə şahidləri çəkib. Videoda yolun kənarında dayanmış yanan avtobusdan qara tüstünün necə çıxdığı əks olunub.

"Əvvəlcə tüstü göründü, sonra sürücü hamıdan təcili çıxmağı xahiş etməyə başladı. Sürücü ən axırıncı çıxdı, o, pəncərədən tullanmalı oldu", - deyə hadisə şahidi bildirib.

Sürücü qeyd edib ki, avtobus işıqforun yanından keçəndə benzin iyi hiss edib. Bundan sonra o, dayanıb və avtobus yanmağa başlayıb. Kişinin sözlərinə görə, o, sərnişinləri çıxardaraq, yanğını söndürməyə cəhd göstərib. Yanğın başlayandan az sonra avtobusun qapıları bağlanıb və sürücü oradan çıxmaq üçün şüşəni sındırmalı olub.

Hadisə yerinə gələn yanğınsöndürənlər tez bir zamanda yanğını söndürüb, bütün sərnişinlər təxliyyə oluna bilib. Ekspertlər yanğının səbəblərini araşdırır.