Femida.az vətəndaşlara hüquqi yardım layihəsini davam etdirir. Bu dəfə araşdırdığımız mövzu orqan transplantasiyası ilə bağlıdır. Şəxsin daxili orqanlarını hansı hallarda digərinə köçürmək olar? Qanunda hansı hallar nəzərdə tutulub?

Mövzu ilə bağlı suallarımızı vəkil Asif Abdullayev cavablandırıb.

“Şəxs özünün sağlığında və ölümündən sonra, daxili orqanlarının istifadə edilməsinə razılıq verə bilər. Mövcud qanunvericiliyə əsasən, donorluğa həm şəxsin sağlığında, həm də ölümündən sonra yol verilir.

Şəxs sağlığında donorluğa (öz orqanlarının digər şəxsə köçürülməsi) yazılı razılığını bildirərsə, ölümündən sonra transplantasiya məqsədi ilə onun orqan və (və ya) toxumalarından istifadə oluna bilər.

Əgər, şəxs sağlığında bu məsələyə münasibətini bildirməyibsə, ölümündən sonra yaxın qohumlarının və ya qanuni nümayəndələrinin icazəsi ilə onun orqan və (və ya) toxumalarının götürülməsinə yol verilir.

Sağlığında donorluqdan yazılı şəkildə imtina edən şəxsin ölümündən sonra ondan transplantasiya məqsədi ilə orqan və (və ya) toxumaların götürülməsinə yol verilmir.
Donorun sağlığında ondan transplantasiya üçün cüt orqanlardan birini, tək orqan və (və ya) toxumalardan isə o miqdarda və həcmdə götürmək olar ki, donorun həyatı üçün təhlükəli hallar, yaxud onun sağlamlığında bərpaolunmaz pozğunluqlar yaranmasın. Donor olan şəxs, əməliyyat nəticəsində hansı ağırlaşmaların əmələ gələ biləcəyi barədə dəqiq məlumat almaq hüququna malikdir.

Bu orqanların transplantasiyasına icazə verilir : ürək, ağ ciyər (ürək-ağ ciyər kompleksi), böyrəklər, qara ciyər, mədəaltı vəzi və onların seqmentləri , sümük iliyi, gözün buynuz qişası və siyahısı müvafiq icra hakimiyyəti orqanı tərəfindən müəyyən edilən digər orqan və (və ya) toxumalar.” Oxu24.com