Yunanıstan hökumətinin Milli Təhlükəsizlik Şurasının təcili iclası keçiriləcək.

Oxu24.com  xəbər verir ki, Türkiyənin dənizlərdəki hərbi və iqtisadi hərəkətliliyindən narahat olan Baş nazir Kiriakos Mitsotakis iclası öz qərargahında təyin edib.

Səbəblər bəlli olsa da, görüşün gündəliyi açıqlanmır.

Yunanıstan Silahlı Qüvvələri Türkiyənin Rodos və Kastelorizo ​​adaları arasındakı ərazidə hərbi təlimlər keçirmək planları ilə əlaqədar narahatlıq keçirir.

Orduda bütün məzuniyyətlər ləğv olunub və döyüş əmrinə tam hazır vəziyyətə gətirilib.

İki ölkənin münasibətlərinin növbəti dəfə gərginləşməsinə səbəb Yunanıstan və Misir arasında dəniz zonalarının delimitasiyası barədə sazişin imzalanması və Türkiyənin Aralıq dənizində karbohidrogen yataqlarında əvvəllər dayandırılmış kəşfiyyat-qazma işlərini dərhal bərpa etmək qərarı olub. Türkiyə, eyni zamanda, Şərqi Aralıq dənizində hərbi təlimlər keçirmək planlarını açıqlayıb. Rəsmi Ankara Yunanıstan və Misir arasında dəniz zonalarının delimitasiyası ilə bağlı razılaşmanı qanunsuz hesab edir. Türkiyə, Yunanıstanın Misirlə razılaşmada göstərilən dəniz zonalarına hüquqlarının olmadığını bildirir. (Publika.az)