“Azərbaycanın sərhəddəki yaşayış məntəqələrinə, hərbi qüvvələrimizin mövqelərinə qarşı istifadə olunan minaatanlar, digər silahlar Serbiya mənşəlidir.

Mən Serbiyanın müvəqqəti işlər vəkili ilə görüşdüm. Açıq şəkildə dedim ki, bizdə tam dəqiq məlumatlar var ki, bu, baş verib və Serbiya tərəfi bunu araşdırmalıdır”.

Oxu24.com -un məlumatına görə, bunu Xarici İşlər nazirinin müavini Xələf Xələfov bildirib.

Onun sözlərinə görə, səfirlik vasitəsilə təmaslar davam edir. Artıq qarşı tərəfin müəyyən cavablar verdiyini deyən Xələf Xələfov hazırda Serbiya tərəfindən rəsmi olaraq bu məsələnin araşdırıldığını qeyd edib:

“Biz Serbiyadan həm izahat tələb etmişik, həm də bu addımların atılmasına gətirib çıxaracaq səbəblərin aradan qaldırılmasını istəmişik. Bu, ikitərəfli münasibətlərə toxunan məsələdir. Beynəlxalq hüquqda malların mənşəyi məsələsində bir liberallıq var.

Ancaq silahların mənşəyi məsələsində vəziyyət fərqlidir. Həmin silahın hansı ölkələrə ixrac edilməsi istehlakçı ölkənin nəzarətində olmalıdır”.

Nazir müavini yaxın vaxtlarda rəsmi araşdırmanın başa çatacağını və Azərbaycan tərəfinə cavab veriləcəyini bildirib.