Göyçayda yırtıcı heyvanlar kəndə hücum edərək fərdi təsərrüfata ziyan vurub. 

APA TV-nin yerli bürosunun xəbərinə görə, canavarlar rayonun Üngütlü kənd sakini Namiq Qəribovun həyətinə hücum edib. Ev sahibinin sözlərinə görə, gecə saat 4:00 radələrində canavar onun bir baş uzunqulağını parçalayıb. O, vaxtında müdaxilə etdiyi üçün inəkləri və qoyunları yırtıcının hücumundan xilas edə bilib. 

Kənd sakinlərinin sözlərinə görə, qış və yaz aylarında canavar və çaqqallar tez-tez fərdi təsərrüfatlara hücum edərək, iri və xırdabuynuzlu heyvanlarını, ev quşlarını tələf edir. 

Çarəsiz qalan kənd sakinləri ov tüfəngindən istifadə etməyə icazə verilməsini və  heyvandarlıq təsərrüfatlarına ziyan vuran vəhşi heyvanlara qarşı tədbir görülməsini istəyirlər.