"İlkin ehtimala görə, müəllimə Nüşabə Ələkbərova infarktdan dünyasını dəyişib. Əlində mikrofonla çıxış edən zaman həyəcanlanıb və qəfləti ölümün qurbanı olub. Onun ürəyində problemlər var idi".Bunu İnterpress.az-a açıqlamasında Tovuz rayonu Köhnəqala kənd həkim məntəqəsinin baş həkimi Telman Cəfərov deyib. T.Cəfərov bildirib ki, hadisə səhər saatlarında Köhnəqala kənd tam orta məktəbin həyətində "Son zəng"lə əlaqədar məzunları təbrik edən zaman baş verib.
Kəndin həkim məntəqəsinin baş həkimi bildirib ki, məktəbin dil-ədəbiyyat müəlliməsi Nüşabə Ələkbərova elə mikrofon əlində olan zaman dünyasını dəyişib: "Hələ ki, müəllimənin ölümünün hansı səbəblərdən baş verdiyi məlum deyil. Buna qəfləti ölüm deyilir. Ola bilsin ki, infarktdan dünyasını dəyişsin. Əvvəllər sağlamlığında elə də ciddi problemi yox idi. Amma ürəyində problemi az da olsa var idi. Ola bilsin ki, mikrofon əlində olan zaman həyəcanlanıb və ürək fəaliyyətində problemlər yaranıb. İlkin diaqnoz qəfləti ölümdür. Həkimlər ora çatana qədər artıq o, dünyasını dəyişmişdi".
Qeyd edək ki, Köhnəqala kənd orta məktəbində keçirilən "Son zəng" tədbiri zamanı təhsil ocağının dil-ədəbiyyat müəllimi, 1965-ci il təvəllüdlü Nüşabə Ələkbərovanın halı pisləşib. Ona yardım göstərilsə də, həyatını xilas etmək mümkün olmayıb.
Oxu24.com
ŞƏRHLƏR