Qazaxıstanda hərbi xidmətə yaz çağırışı və bir il xidmət edən əsgərlərin tərxis edilməsi dayandırılıb.

Oxu24.com-un Mərkəzi Asiya ölkələri üzrə bürosu xəbər verir ki, bu haqda  informasiya və ictimai inkişaf naziri Dauren Abayev danışıb.

“Müdafiə Nazirliyi fövqəladə vəziyyət tətbiq edilməsi ilə əlaqədar olaraq 2019-cu ilin yazında hərbi xidmətə çağırışı və  əsgərlərin tərxis edilməsini dayandırıb”. Abayev brifinqdə belə deyib.

Koronavirusun yayılması ilə əlaqədar fövqəladə vəziyyət rejimi Qazaxıstanda martın 16-dan etibarən qüvvədədir. Ölkə ictimai asayişin qorunmasını gücləndirib, kütləvi tədbirlərə qadağa tətbiq edib və iri ticarət obyektlərinin işini məhdudlaşdırıb. Əyləncə mərkəzləri, kinoteatrlar, teatrlar, sərgilər və kütləvi izdihamlı digər obyektlər müvəqqəti bağlanıb. Qazaxıstan ərazisinə giriş-çıxışda məhdudiyyətlər var. Dövlət sərhədinin buraxılış məntəqələrində, dəmir yolu vağzallarında və hava limanlarında sanitariya-epidemioloji rejim gücləndirilib.

Hal-hazırda Almatı və Nur-Sultan karantindədir.

Məhz bu iki şəhərdə koronavirus infeksiyası halları ilk dəfə qeydə alınıb.

Qazaxıstanda 18-27 yaş arası 16 mindən çox gəncin hərbi xidmətə çağırılması planlaşdırılırdı.