Rusiya prezidenti Vladimir Putin Anatoli Antonovu Rusiyanın ABŞ-dakı səfiri vəzifəsindən rəsmən azad edib.

Oxu24.com xəbər verir  ki, Putinin imzaladığı müvafiq fərman hüquqi informasiyanın rəsmi internet portalında dərc olunub.

“Antoli İvanoviç Antonov Rusiya Federasiyasının Amerika Birləşmiş Ştatlarında fövqəladə və səlahiyyətli səfiri vəzifəsindən azad edilsin”, - sərəncamın mətnində deyilir.

Diplomat həmçinin Vaşinqtonda Amerika Dövlətləri Təşkilatında Rusiya üzrə daimi müşahidəçi vəzifəsindən də azad edilib.

Antonov Rusiyanın ABŞ-dakı səfiri kimi işini oktyabrın 5-də başa vurub. O, 2017-ci ilin yayında bu vəzifəyə təsdiqlənib. Oktyabrın 6-da diplomat Moskvaya qayıdıb.

Rusiya prezidentinin mətbuat katibi Dmitri Peskov Antonovun geri qayıtmasını şərh edərkən bildirib ki, belə bir qərar Rusiya ilə ABŞ arasında diplomatik münasibətlərin səviyyəsinin aşağı düşməsi demək deyil. Onun sözlərinə görə, Vaşinqtona yeni səfir vaxtında təyin olunacaq.

Qeyd edilib ki, yeni səfirin təyinatı ABŞ-da prezidentlik yarışının nəticələrindən asılı olmayacaq.

Bundan əvvəl Putin Oleq Levini Rusiyanın Omandakı səfiri təyin etmişdi.

Miri