Avropa Parlamentinin oktyabrın 9-da qəbul etdiyi qətnamə Gürcüstanda oktyabrın 26-na təyin edilmiş parlament seçkilərinə müxalifətin xeyrinə müdaxilədir.

Oxu24.com xəbər verir  ki, bunu hakim Gürcü Arzusu - Demokratik Gürcüstan Partiyasının icraçı katibi Mamuka Mdinaradze mətbuat konfransında deyib.

Çərşənbə günü Avropa Parlamentinin üzvləri Aİ-nin Gürcüstana ayırdığı maliyyənin dondurulmasını, eləcə də Avropa rəsmilərinin fikrincə, ölkədə “demokratiyaya zərbə vuran” şəxslərə, o cümlədən hakim partiyanın təsisçisinə qarşı sanksiyaları tələb edən qətnaməni dəstəkləyiblər.  

Sənəddə həmçinin Gürcüstanda “xarici agentlər” haqqında qəbul edilmiş qanunlar və LGBT təbliğatına qadağalar barədə tənqidlər də yer alıb.

"Bu, ölkənin daxili işlərinə müdaxilə olmaqla yanaşı, həm də seçkilərə Milli Hərəkatın xeyrinə təsir etmək cəhdidir", - Mdinaradze bildirib.

Onun sözlərinə görə, qətnamə Gürcüstan hakimiyyətini Rusiya Federasiyasına qarşı iqtisadi sanksiyalar tətbiq etməyə çağırır: “Bu o deməkdir ki, iqtisadi baxımdan Gürcüstan bütün hesablamalara görə, pandemiya dövründəkindən ən azı iki dəfə pis vəziyyətdə olacaq. ”

Nigar