Fransanın mədəniyyət naziri Raşida Dati Eyfel qülləsinin statusunun dəyişdirilməsini və tarixi abidə kimi qeydiyyata alınmasını istəsə də, Paris meri Ann Hidalqo bu tələbin əleyhinədir.

OXU24.COM xəbər verir ki, Fransanın “Le Parisien” qəzetinə verdiyi açıqlamada Dati Fransanın digər böyük şəhərləri ilə müqayisədə Parisdə qeydə alınan tarixi abidələrin sayının az olmasından narazılığını bildirib.

Fransız mətbuatında yer alan xəbərlərə görə, Hidalqo Eyfel qülləsini onsuz da çox yaxşı qoruduğunu bildirir. Eyfel qülləsi ilə bağlı verilən qərarlar zaman-zaman Dati ilə Hidalqo arasında fikir ayrılığına səbəb olur.

Dati yanvar ayında 2026-cı ildə Paris merliyinə namizədliyini irəli sürdüyünü açıqlasa da, 10 ildir paytaxtda çalışan Hidalqonun yenidən namizəd olub-olmayacağı hələ məlum deyil.

Qeyd edək ki, qüllə 1889-cu ildə Fransa İnqilabının 100 illiyi münasibətilə keçirilən Paris Ümumdünya Sərgisi üçün tikilib.