Türkiyə prezidenti Rəcəb Tayyib Ərdoğanın İsrailə qarşı ittifaq çağırışı bir çox ölkədə - Rusiyadan ABŞ-a, İrandan İsrailə, Livandan Birləşmiş Ərəb Əmirliklərinə qədər rezonans doğurub.

İsrailin “Maariv” qəzeti Ərdoğanın İslam birliyi üçün hərəkətə keçməyə başladığını və Misir prezidenti Əbdülfəttah əs-Sisinin Türkiyəyə səfərinin də bu addımlardan biri olduğunu yazıb. Qəzet əs-Sisinin səfərinin fonuna diqqət çəkib.

“Ərdoğan İsraili dayandırmaq üçün İslam birliyinə çağırıb. “Maariv” qəzeti yazır ki, o, “İsrail dövlət terrorunu dayandıracaq yeganə addımın İslam ölkələrinin birliyi olduğunu” deyib və bununla da öz qətiyyətini dünyaya nümayiş etdirib”.

Yaxın Şərq xəbərlərinin təhlili ilə tanınan Londonda yerləşən Middle East Eye internet saytı, “Arab News” və Livanın “El Mayadeen” telekanalı Ərdoğanın sözlərini manşetlərə çıxarıb. El Mayadin telekanalı xəbəri “Ərdoğan İsrailə qarşı İslam birliyinə çağırır” sərlövhəsi ilə yayımlayaraq, Misir prezidenti əs-Sisinin Türkiyəyə səfərinin bu baxımdan önəmli olduğunu qeyd edib.

Rusiyanın RT telekanalı da prezident Ərdoğanın İsrailə qarşı ittifaq çağırışına geniş yer verib. Telekanal Ərdoğanın “İslam dünyası bir ağızdan danışsa, İsraili dayandırmaq olar” sözlərini sitat gətirib və əlavə edib: “Ərdoğan İsrailə qarşı İslam birliyi istəyir. Ərdoğanın çağırışı təkcə ərəb dünyasında deyil, bütün dünyada rezonans doğurmaqda davam edir”.

Amerikanın “New York Post” qəzeti yazıb ki, prezident Ərdoğan İsrailə qarşı sərt ritorika ilə yanaşı, İslam dünyasını birləşdirməyə çalışır: “Türkiyə prezidenti Ərdoğan İsrail ekspansiyasının yaratdığı artan təhlükəyə qarşı İslam ittifaqını birləşdirir”.

İranın İSNA xəbər agentliyi qeyd edir ki, prezident Ərdoğan uzun müddətdir özünü fələstinlilərin böyük himayədarı kimi göstərib və bunu həm sözləri, həm də əməlləri ilə sübut edib. BƏƏ-nin “Al Arabiya” qəzeti də Ərdoğanın çağırışının türk əsilli amerikalı Ayşenur Ezgi Eyginin İordan çayının qərb sahilində İsrail əsgərləri tərəfindən vurulmasından sonra gəldiyini qeyd edib. “Al Arabiya” yazıb: “Eyginin ölüm xəbərindən sonra Ərdoğan öz mövqeyini xeyli sərtləşdirdi”.

Nigar