Qazinin ev almasına kimlər əngəl olur? - ŞİKAYƏT

Qarabağ  Müharibəsi qazisi, ikinci  qrup  Qarabağ  əlili   Həsənov  Bəymirzə  Gülmirzə  oğlu  illərdir   Dövlət tərəfindən ona  veriləcək  mənzilini   ala  bilmir.

 

Bununla bağlı Oxu24.com-a qazinin  özü  məlumat  verib.

 

2003-cü  ilin  dekabrında  Füzulidə  hərbi  vəzifəsini  yerinə  yetirərkən snayper  yarası  alan  Bəymirzə  Həsənov illərdir ki, mənzil növbəsində olsa da, həmin  mənzili  ala  bilmir.

 

“2002-ci ildə hərbi xidmətə  yollandım. Həmin   vaxt  Füzulidə  postda  xidmət edirdim. Xidmət zamanı düşmən tərəfindən atılan güllə yarasından ağır  yaralandım. Həmin  vaxtdan  ikinci  qrup   əlillliyim  yarandı. Bu gün  həm  əlilliyə  görə pensiya, həm də Prezident təqaüdü alıram. Mənim bu  gün ən böyük problemim qanunla nəzərdə  tutulmuş mənzilin hələ  də mənə  verilməməsi ilə bağlıdır.

05.11.2008-ci ildən etibarən Qarabağ müharibəsi 2-ci qrup əlillərinin mənzil uçot siyahısındayam. Buna baxmayaraq mənzili ala bilmirəm.  Bir neçə dəfə rəsmi müraciət etmişəm. Mənim qeydiyyatım və  yaşayış yerim Yasamal rayonudur.

Cənab Prezidentin göstərişinə görə  evlər yaşayış  yerinə  uyğun şəkildə  verilməliidr. Xahiş edirəm ki, aidiyyatı qurumlar bunu nəzərə alıb mənim mənzillə təmin olunmağıma tez bir zamanda köməklik göstərsinlər”, - deyə   qazi   Bəymirzə   Həsənov  bildirib.

 

Onun sözlərinə görə uzun müddətdir ki, qazi kimi avtomobil növbəsində olsa da,onu da ala bilməyib.

 

“Bu gün ev problemimə görə evlənə də bilmirəm.Artıq 40 yaşıma çatmışam. Hazırda  kirayədə  yaşadığım  üçün  evlənə də bilmirəm.Bundan əlavə mənim haqqım olan avtomobili də ala bilməmişəm. Dəfələrlə etdiyim müraciətlərə baxmayaraq  cavab  verən  yoxdur”,- deyə  Bəymirzə  Həsənov  bildirib.

Oxu24.com məsələni diqqətdə saxlayacaq.

 

Miri Məcidli