İsrail ordusu Təl-Əvivin mərkəzinə bir gecədə edilən hücumun Yəməndən atılan dəyişdirilmiş İran pilotsuz uçan aparatı tərəfindən həyata keçirildiyini güman edir.

Bu barədə İsrail Müdafiə Qüvvələrinin sözçüsü Daniel Həcəri brifinqdə məlumat verib.

“Gecə dənizdən, qərbdən, Yəməndən atıldığına inandığımız bir pilotsuz təyyarə daxil oldu. Təl-Əvivin mərkəzindəki binaya çırpılıb. Zərbə nəticəsində 1 mülki şəxs həlak olub, səkkiz nəfər yüngül xəsarət alıb”.

Xaqarinin sözlərinə görə, indi hərbçilər cihazın hava hücumundan müdafiə qüvvələri tərəfindən niyə aşkar edilmədiyini və hava hücumu xəbərdarlığının niyə elan edilmədiyini araşdırır. İsrail ordusu hesab edir ki, söhbət İranın Səməd modelli PUA-dan gedir. “Bunlar İran silahlarıdır ki, onların uçuş məsafəsini artırmaq üçün təkmilləşdirilib”.

Bundan əvvəl İsrail polisinin mətbuat xidməti bildirmişdi ki, iyulun 19-na keçən gecə Tel-Əvivin mərkəzində güclü partlayış eşidən insanlardan yüzlərlə zəng daxil olub. Təcili yardım xidmətinin məlumatına görə, hadisə Təl-Əvivin mərkəzində Ben Yehuda və Şalom Aleyxem küçələrinin küncündə baş verib. ABŞ Konsulluğunun binası hadisə yerindən təxminən 150 metr aralıda yerləşir.

Ordunun mətbuat xidməti hadisənin “hava hədəfinin düşməsi” nəticəsində baş verdiyini və həyəcan siqnallarının çalmadığını bildirib. Hadisə ilə bağlı araşdırma aparılır. İsrail Hərbi Hava Qüvvələri ölkənin hava məkanında patrul xidmətini gücləndirib. Hadisəyə görə məsuliyyəti üsyançı Yəmənin Ənsar Allah (Husi) hərəkatı öz üzərinə götürüb. Üsyançıların sözlərinə görə, hücum üçün hava hücumundan müdafiə sistemlərindən yan keçə bilən yeni İHA modeli istifadə edilib.

Nigar