ABŞ prezidenti Co Baydenin administrasiyası Fələstinin İrlandiya, Norveç və İspaniya tərəfindən tanınmasını faydalı hesab etmir, lakin bunun niyə baş verdiyini anlayır.

Oxu24.com  xəbər  verir  ki,bu barədə “Politico” mənbələrə istinadən yazır.

Materialda qeyd olunur ki, Vaşinqton üç Avropa ölkəsinə onların qərarının fayda gətirməyəcəyini açıq şəkildə bəyan edib, çünki ABŞ tanınmanın HƏMAS-ı gücləndirə biləcəyindən ehtiyat edir.

Amerika və İrlandiya rəsmilərinin nəşrə verdiyi məlumata görə, Fələstinin tanınması elanından bir qədər əvvəl avropalı siyasətçilər Bayden administrasiyası ilə danışıqlar aparıblar və bu danışıqlar zamanı heç bir müxalifətlə qarşılaşmayıblar.

Ağ Ev İrlandiya, Norveç və İspaniyanın Fələstini niyə tanımaq qərarına gəldiyini anladığını bildirib.

Eyni zamanda, “Politico” ABŞ Milli Təhlükəsizlik Şurasına istinadən Vaşinqtonun mövqeyini qeyd edir ki, Fələstinin tanınması birtərəfli tanınmalarla deyil, danışıqlar nəticəsində baş verməlidir.

Mayın 22-də Norveç hökuməti Fələstin Dövlətinin müstəqilliyini tanıdığını rəsmən elan edib. Qərar mayın 28-dən qüvvəyə minəcək. Norveçdən sonra Fələstinin müstəqilliyi İrlandiya və İspaniya tərəfindən tanındı.

Bundan əvvəl İsrailin Fələstini tanıyan Norveç, İrlandiya və İspaniyaya qarşı yeni tədbirlər hazırladığı məlum olub.

Miri