Çexiyanın xarici işlər naziri Yan Lipavski ölkədəki obyektlərə kiberhücumlarla bağlı vəziyyətlə əlaqədar Rusiyanın bu ölkədəki səfiri Aleksandr Zmeevskini çağırıb.

 

Oxu24.com  xəbər  verir  ki, bu barədə ČTK agentliyi məlumat yayıb.

 

"Biz Rusiyanı BMT normalarına və öz öhdəliklərinə zidd olan bu hərəkətlərini dayandırmağa çağırdıq", - Lipavski bildirib.

 

Rusiya səfirliyi səfirin çağırışını şərh etməyib.

 

Mayın 5-də o da məlum olub ki, Çexiya hökuməti respublikanın Rusiyadakı səfiri Vitezslav Pivonkanı vətəninə rəsmən geri çağırıb. Bu barədə Çexiya Xarici İşlər Nazirliyi məlumat yayıb.

 

Çexiya Xarici İşlər Nazirliyi mayın 3-də bildirib ki, ölkədəki dövlət qurumları və mühüm infrastruktur obyektləri 2023-cü ildən bəri Rusiya ilə əlaqəli hakerlərin hücumuna məruz qalıb.

 

Ölkə Xarici İşlər Nazirliyinin məlumatına görə, hücumların arxasında APT28 qruplaşması dayanır. Nazirliyin saytında dərc olunan bəyanatda bildirilir ki, hakerlər Çexiyanın idarə və təşkilatlarından məlumatları oğurlamağa cəhd ediblər.

 

Bundan əvvəl Çexiya prezidenti Avropa qoşunlarının köməyi ilə Ukraynaya dəstək üçün “yeni yollar” axtarılacağını bəyan edib.

 

Nigar

 

Oxu24.com