Hindistanda bir sutka ərzində iki nəfər vəhşi meymunların qurbanı olub. Hadisə Uttar-Pradeş ştatında baş verib.
Oxu24.com xəbər verir ki, ölənlərdən biri olan 60 yaşlı qadın açıq havada yemək bişirərkən meymun sürüsünün hücumuna məruz qalıb. O, meymunlarla mübarizə aparmağa çalışsa da, yıxılıb. Qadını xəstəxanaya çatdırsalar da, onun həyatını xilas etmək mümkün olmayıb. O, aldığı xəsarətlər nəticəsində ölüb.

Meymunların daha bir hücumu qonşu kənddə olub. Orada isə 20 yaşlı oğlanın üstünə hücum ediblər. Həmin vaxt evin damında olan oğlan qaçarkən yıxılıb ölüb.

Yerli sakinlər deyir ki, bu, meymunların ilk hücumları deyil. Bundan əvvəl də dəfələrlə adamlara hucum ediblər. Onlar baş verənləri vəhşi meymunların sayının artmasıyla izah edirlər.

Dövlət orqanları ölüm hadisələri qeydə alınan ərazilərdə meymunların tutulmasıyla məşğul olacaqlarını bildiriblər.

2018-ci ilin noyabrında da Uttar-Pradeş ştatında meymunun bir evə hücum edərək, anasının əlindən 12 yaşlı uşağı götürüb qaçdığı və daha sonra onu öldürdüyü barədə məlumat yayılmışdı. Oxu24.com