İsrail prokurorları və təhlükəsizlik rəsmiləri Beynəlxalq Ədalət Məhkəməsinin yəhudi dövlətini Qəzza zolağında soyqırım törətməkdə ittiham edə biləcəyindən narahatdırlar.

Oxu24.com  xəbər  verir  ki,bu barədə İsrailin “Haaretz” qəzeti məlumat yayıb.

Nəşrin məlumatına görə, adı açıqlanmayan hüquq eksperti İsrail ordusunun komandanlığına, o cümlədən Baş Qərargah rəisi Herzi Ha-Leviyə Beynəlxalq Ədalət Məhkəməsinin Qəzzada atəşkəs tələbi ilə qərar qəbul etməsinin real ehtimalı barədə xəbərdarlıq edib. 

İsrail hərbçiləri və ölkənin prokurorluğu şikayətə baxılması üçün artıq hazırlıqlara başlayıb. Bu məsələ ilə bağlı ölkənin Xarici İşlər Nazirliyində iclasın keçiriləcəyi bildirilir.

Haaretz qeyd edib ki, Beynəlxalq Ədalət Məhkəməsindəki mühakimə İsrailə qarşı soyqırım ittihamlarını gücləndirə və onun diplomatik təcridinə, boykot və sanksiyalara səbəb ola bilər.

Məqalədə vurğulanır ki, İsrailin yurisdiksiyasını tanımadığı Beynəlxalq Cinayət Məhkəməsindən fərqli olaraq, yəhudi dövlətinin Beynəlxalq Ədalət Məhkəməsi qarşısında öhdəlikləri var.

Bundan əlavə, İsrail BMT-nin “Soyqırım cinayətinin qarşısının alınması və cəzalandırılması haqqında” Konvensiyasını imzalayıb və ratifikasiya edib.

Müəllif:Afət