İsrail İspaniya hökumətinin bir hissəsinin Yaxın Şərqdəki vəziyyətlə bağlı mövqeyindən narazılığını bildirib və diplomatik fikir ayrılıqlarına səbəb olub.

Oxu24.com xəbər verir  ki, Bu barədə EL PAÍS qəzeti məlumat yayıb.

Bir neçə solçu siyasətçi Madridi İsrailin baş naziri Benyamin Netanyahunu Beynəlxalq Cinayət Məhkəməsinə çıxarmağa çağırıb və bu, diplomatik qalmaqala səbəb olub.

Mübahisə koalisiya hökumətindəki solçu ispan siyasətçilərinin İsraili Fələstin xalqının “soyqırımında” iştirak etməkdə ittiham etməsindən sonra yaranıb.

İsrailin İspaniyadakı səfirliyi bildirib: “İspan hökumətindəki bəzi elementlər terrorçularla birləşmək qərarına gəliblər. Bu bəyanatlar nəinki tamamilə əxlaqsızlıqdır, həm də İspaniyadakı yəhudi icmalarının təhlükəsizliyini təhlükə altına qoyur, onları daha çox antisemit hadisələr və hücumlar riski ilə üz-üzə qoyur”.

Öz növbəsində İspaniya Xarici İşlər Nazirliyi cavab verib ki, o, “İsrail səfirliyinin bəyanatında yer alan yalanları qəti şəkildə rədd edir” və hökumət üzvlərinə qarşı “böhtanı qəbul etmir”.

Bu maraqlar toqquşması İspaniyada müxtəlif siyasi partiyaların nümayəndələrinin, o cümlədən solçu Sumar hərəkatının baş nazirinin müavini Yolanda Diazın qatıldığı Madriddə Fələstinə dəstək aksiyasından sonra baş verib.

Qeyd edək ki, bu gün İspaniya Qəzza zolağının əhalisinə 1 milyon avro dəyərində humanitar yardım göndərib. Krallıq daha da çox vəsait ayırmağa hazır olduğunu bəyan edib. Bu barədə oktyabrın 17-də xarici işlər naziri vəzifəsini icra edən Xose Manuel Albares mətbuat konfransında bildirib.

Müəllif:Nigar