Sudanın paytaxtı Xartumun bəzi məhəllələrində və ölkənin cənubunda Ubeyd və qərbdə Nyala şəhərlərində ordu ilə Çevik Dəstək Qüvvələri (HDK) arasında qarşıdurmalar davam edir.

Oxu24.com xəbər verir  ki,hadisə şahidləri HDK-nın paytaxt Xartumda ordunun nəzarətində olan Zirehli Bölmə qərargahına top mərmiləri ilə hücum etdiyini, ordunun hücumu dəf etmək üçün döyüş təyyarələrindən istifadə etdiyini bildirib.

Şahidlərin sözlərinə görə, Xartumun Nuzha, Uşra, Cəbra və Lamab məhəllələrində qarşıdurmalar gedir.

Paytaxtın qərbində yerləşən Umdurman şəhəri də şiddətli toqquşmalara səhnədir.

Xartumdakı əl-Kadaru düşərgəsi yaxınlığında yerləşən Bəhri şəhərinin məhəllələri iki gün dalbadal HDK tərəfindən intensiv bombardmana məruz qalır.

Ölkənin cənubundakı Şimali Kurdufan əyalətinin mərkəzi olan Ubeyd şəhərində iki tərəf arasında qarşıdurma baş verib.

Cənubi Darfur əyalətinin qərbindəki Nyala şəhərində münaqişə zəminində ailələr köç etməkdə davam edir.

“Darfur ordu ilə HDK arasında döyüş meydanına çevrilib”

Darfur hökumətinin rəsmisi yerli mətbuatda dərc olunan bəyanatda Darfurun Sudan Silahlı Qüvvələri ilə HDK arasında "döyüş meydanına çevrildiyini" bildirib.

Bir çox bölgələrdə qarşıdurmaların yayılması səbəbindən ölənlərin sayının müəyyən edilə bilmədiyini qeyd edən rəsmi, humanitar yardımın çatdırılmasının hökumət və yardım təşkilatları üçün qeyri-mümkün hala gəldiyini bildirib.

"Çox çətin şəraitdə Çada qaçan 600 mindən çox insan var. Humanitar vəziyyət ağırdır. Ərzaq və tibbi ləvazimat çatışmazlığı var", - o deyib. 

Birləşmiş Millətlər Təşkilatının (BMT) Sudanda İnteqrasiya Keçid Dövrünə Yardım Missiyası (UNITAMS) dünən verdiyi açıqlamada, "Missiya Cənub və Qərbi Kürdufan əyalətlərində məskunlaşan ərazilərdə son zamanlar zorakılığın artması ilə bağlı təşvişə düşüb",- qeyd edilib.

Açıqlamaya görə, qərbi Kürdufan vilayətinin mərkəzi olan Fula şəhərində ordu ilə HDK arasında toqquşmalar avqustun 16-dan intensivləşib, dövlət idarələri, banklar, BMT ofisləri və qeyri-hökumət təşkilatları da talan edilib. .

"Münaqişədən zərər çəkmiş insanların əzabını yüngülləşdirmək üçün bütün hərbi hərəkətlər və səfərbərlik dərhal dayandırılmalıdır", - bəyanatda deyilir. Bəyanatda münaqişə tərəflərini mübahisələrini həll etmək üçün dialoqa qayıtmağa çağırış da yer alıb.

Sudanda ordu ilə HDK arasında toqquşma olub

Sudan ordusu bir vaxtlar dəstəklədiyi, lakin müstəqil və paralel ordu kimi fəaliyyət göstərdiyi üçün təhlükə olaraq gördüyü HDK-nın 2 il ərzində orduya tam inteqrasiyasını istəyirdi.

HDK-nın mülki hökumətdən sonra təxminən 10 ili əhatə edən bir müddətdə bunu qəbul edə biləcəyini bəyan etməsi ilə başlayan şifahi müharibə və gərginlik, 15 aprel səhəri paytaxt Xartum və müxtəlif şəhərlərdə tərəflər arasında silahlı qarşıdurmaya çevrildi. .

Xartum və ətraflarında, xüsusilə qərb şəhərlərində hələ də davam edən və artıq 5-ci ayını tamamlayan şiddətli qarşıdurmalarda əksəriyyəti mülki şəxslər olmaqla 3000-dən çox insan həyatını itirib, on minlərlə insan yaralanıb.

Birləşmiş Millətlər Təşkilatının məlumatına görə, Sudandakı münaqişə ucbatından 4,3 milyondan çox insan didərgin düşüb.

Müəllif: Nigar