Qərbi Afrika Ölkələri İqtisadi Birliyinin (ECOWAS) nümayəndə heyətinin Nigerdə ​​hakimiyyəti ələ keçirmiş Vətəni Müdafiə Milli Şurasının (CNSP) üsyançıları ilə apardığı danışıqlar nəticəsiz qalıb.

Oxu24.com xəbər verir  ki,bu barədə Associated Press nümayəndə heyətinin anonim üzvünə istinadən məlumat yayıb.

Diplomat bildirib ki, Nigerdəki böhranın sülh yolu ilə həlli üçün təxminən iki saat davam edən danışıqlar demək olar ki, heç bir nəticə verməyib. Bundan əlavə, hərbi müdaxilənin qarşısını almaq üçün əlavə addımlar müəyyən edilməyib.

Xüsusilə, ECOWAS nümayəndələri devrilmiş prezident Mohamed Bazum-un azad edilməsində və səlahiyyətlərinin bərpasında təkid edirdilər, üsyançıların lideri general Abdurahman Tchiani isə CNSP nümayəndələrinə qarşı sanksiyaların ləğvini tələb edirdi. Bununla belə, hər iki tərəf güzəştə getməyib.

Danışıqların nəticəsiz qalmasından sonra ECOWAS nümayəndə heyəti Nigeri tərk etmək niyyətindədir.

Avqustun 19-da ECOWAS hərbi koalisiyası konstitusiya quruluşunu bərpa etmək üçün Nigerə hərbi müdaxilə etmək niyyətini təsdiqləyib və müdaxilənin başlanması üçün vaxt seçdiklərini açıqlayıb.

Bundan sonra ECOWAS diplomatik nümayəndə heyəti Nigerə gəldi və Tchiani ilə ilk dəfə şəxsən görüşdü. Üsyançıların lideri bildirib ki, ölkəsi müharibə istəmir, lakin buna hazırdır. Daha əvvəl bildirilmişdi ki, Niger silahlı qüvvələri hücumu dəf etmək üçün qoşunları sərhədlərə çəkir.

Müəllif: Nigar