“Əfqan Brüs Li” adlandırılan Əfqanıstandan olan aktyor Abbas Əlizadə vətənini tərk edərək İngiltərəyə köçmək məcburiyyətində qalıb.
Oxu24.com xəbər verir ki, Abbas Əlizadə bu barədə Kanadanın “Toronto Star” nəşrinə müsahibəsində danışıb.
Aktyorun sözlərinə görə, Əfqanıstanda Taliban hərəkatının meydana çıxması ilə digər əfqan sənətçiləri, idmançıları və musiqiçiləri kimi o da təhlükə altında idi, çünki onların fəaliyyəti “qeyri-islami” hesab olunur.
Əlizadə aktyor və xəzər etnik qrupunun nümayəndəsi kimi bir ildən çox gizlənməyə məcbur olub. O, axtarışa verilməsə də, diqqəti cəlb etməmək və populyarlığına görə həbs edilməmək üçün saqqal saxlayıb.
Aktyorun sözlərinə görə, o, Hollivud rejissorlarından biri ilə əlaqə saxlayıb və 2020-ci ildə ABŞ-a iş vizası almağa yaxın olub, lakin Talibanın gəlişi ilə Amerikanın Kabildəki səfirliyi bağlanıb və Əlizadə heç vaxt ondan cavab almayıb.
ABŞ-ın İslamabaddakı ofisinən məktub yazsa da, bu da nəticəsiz olub.
Əlizadə 2022-ci ilin dekabrında Britaniya QHT-si tərəfindən sponsorluq edilən və təxliyə edilən 32 əfqan idmançı ilə birlikdə ölkədən qaçanlar arasında olub.
O, Böyük Britaniyada yaşayış icazəsi alıb və hazırda Mançesterdə yaşayır. Aktyor deyir ki, tezliklə arzusunu reallaşdıracaq - 2023-cü ilin yayında işləməsi planlaşdırılan Hollivud filmində rol alacaq.
Tərcümə: Miri Məcidli
Oxu24.com
ŞƏRHLƏR