Amerika hakimiyyətinin hesablamalarına görə, Rusiyanın Ukraynaya tammiqyaslı hücumu zamanı mülki əhali, eləcə də hərbçilər arasında gözlənilən itkilər 85 min nəfər təşkil edəcək. 

Publika.az xəbər verir ki, bu barədə “Reuters” ABŞ rəsmilərinə istinadən məlumat yayıb.

Nəşr qeyd edir ki, 25 minə qədər ukraynalı hərbçi, 10 minə qədər rusiyalı və 50 minə qədər mülki şəxs həlak ola bilər. Agentliyin məlumatına görə, son günlər Rusiya Ukrayna ilə sərhəddə batalyon taktiki qruplarının sayını 60-dan 83-ə çatdırıb, daha 14-ü isə yoldadır.

Məqalədə vurğulanır ki, hərbi əməliyyatlar fevralın 15-də başlayacaq, ABŞ hakimiyyəti isə Rusiya prezidentinin planlarında tammiqyaslı işğaldan başqa planların olmasını istisna etmir.

Bir müddət əvvəl Almaniyanın “Bild” qəzeti xarici kəşfiyyat hesabatına istinadən Moskvanın Ukrayna ərazisinin işğalından sonra Rusiyanın “Xalq Radası” yaratması, Ali Radanı qeyri-qanuni elan etməsi və Ukraynanı Rusiyaya birləşdirməsi planından bəhs edib.