Ukrayna hüquq-mühafizə orqanları polşalı həmkarları ilə birlikdə Rusiya xüsusi xidmət orqanları ilə əməkdaşlıqda şübhəli bilinən Polşa vətəndaşını saxlayıb.

Bu barədə Ukraynanın Təhlükəsizlik Xidməti və Baş Prokurorluğu məlumat yayıb.

Müstəntiqlərin fikrincə, şübhəli öz təşəbbüsü ilə Rusiya Silahlı Qüvvələrinin komandanlığının nümayəndələri ilə əlaqə yaradıb və Rusiya hərbi kəşfiyyatı üçün işləməyə hazır olduğunu bildirib. Onun vəzifəsinin Polşanın Jeşuf-Yasionka hava limanının təhlükəsizliyi haqqında məlumat toplamaq və ötürmək olduğu güman edilir.

“Bu, xüsusilə Rusiya xüsusi xidmət orqanlarına Zelenskinin (Ukrayna Prezidenti Volodimir - red.) bu ölkədə olduğu müddətdə həyatına mümkün sui-qəsdi planlaşdırmağa kömək etməli idi”, - Ukrayna prokurorluğunun bəyanatında deyilir.

Polşa prokurorluğu saxlanılan şəxsi Polşaya qarşı xarici kəşfiyyatın maraqlarına uyğun hərəkət etməyə hazır olmaqda ittiham edib.