Hər kəs sevmək, sevilmək və unudulmaz bir sevginin baş qəhrəmanı olmaq istəyir. Amma indi danışacağımız sevgi hekayəsi nağılları deyil, qorxulu hekayələri xatırladır. Obsesif xəstəxana işçisi Karl Tanzler və xəstəxanaya yol tapan gözəl Elena Milaqronun baş rol aldığı bu hekayə sizi bir az qorxudacaq.

Milli.Az sfera.az-a istinadən bildirir ki, o dövrdə çox ölümcül və ağır xəstəlik olan vərəmə yoluxan Elena 1930-cu il aprelin 22-də anası ilə birlikdə xəstəxanaya gedib. Elenanı ilk gördüyü an ona aşiq olan Karlın dediyinə görə, o illərlə arzuladığı qadın olub. Karl Elenanı bu ölümcül xəstəlikdən xilas etmək və sağaltmaq üçün çox çalışıb. O qədər ciddi çalışıb ki, hətta rentgen aparatını da evinə aparırdı.

Karl xəyallarındakı qadını itirmək barədə düşünmək belə istəmirdi.

Elenanı sevindirmək üçün ona gözəl hədiyyələr və dəbli zinət əşyaları alırdı. Onun xoşbəxtliyi üçün çox şey etməyə hazır idi, amma gözlənilən kədərli son gəldi.

Karlın bütün cəhdlərinə baxmayaraq, Elena vərəm xəstəliyindən 25 oktyabr 1931-ci ildə vəfat edib.

Pərişan olan Karl sevdiyi qadının dəfn xərclərini öz pulu ilə ödəyib və hətta Elenanın ailəsinin razılığı ilə onun üçün məqbərə də tikdirib. O, hər gecə tikdirdiyi bu məqbərəyə gedir, orada gözləyir, Elena ilə vaxt keçirirdi. Karlın dediyinə görə, Elenanın ruhu hər gecə onun yanına gəlib və onun cəsədini evə aparmasını deyib.

Elenanın ölümündən düz 2 il sonra Karl bir gecə plan qurub.

İndi o, Elenanın arzusunu yerinə yetirib evinə aparacaqdı. Bir gecə qaranlıqda qəbiristanlığa gizlicə girib və qadının çürümüş cəsədini məzarından çıxararaq, evinə aparıb.

Hekayə zaman keçdikcə daha dəhşətli olur.

O, piano məftilindən istifadə edərək çürüyən bədənin sümüklərini birləşdirub. Cəsədin çürüyən hissələri və dərisi üçün muma batırılmış parça ilə qadının üzünü düzəltməyə çalışıb. Karl, meyitin gözləri yerinə şüşə gözlərdən, saç yerinə parikdən istifadə edib. Bədənin əvvəlki həcmini və ölçüsünü bərpa etmək üçün gövdəni açıb içərisinə nələrsə doldurub. O, meyiti gözəlləşdirməyə və sevimli Elenasına qovuşmağa çalışıb. Ona gözəl paltarlar geyindirərək, ən zərif zinət əşyalarını taxıb. Çürük qoxusunu aradan qaldırmaq üçün tonlarla ətir şüşəsinə pul xərcləyib. Onu bəzəyib-düzəldib və çarpayısının başına qoyub.

Karlın bu azğın davranışı 7 il davam edib.

Bundan xəbər tutan Elenanın bacısı onu polisə xəbər verib. Bunun üzərinə polis onu tutmaq üçün Karlın evinə doğru yola düşüb. Polislər Karlın evinə gələndə onu pəncərənin qarşısında Elenanın meyiti ilə rəqs edərkən görüblər. Polis dərhal Karlı həbs edib və Elenanın cəsədinə layiq olduğu dinclik verilib.

Polis Karlı həbs etsə də, bir müddət sonra işə xitam verildi. Karl azad edildi, yeni bir yerə köçdü və bu hadisələri arxada qoymağa çalışsa da, bacarmadı. Təəssüf ki, Karl özünü insan boyda kukla düzəltdi. Bu körpə Elenaya bənzəyirdi. Beləliklə, Elena ilə olan vəsvəsəsindən çıxa bilməyib, özü üçün tamamilə yeni Elena kuklası yaratmış olub. 75 yaşında son nəfəsini verəndə Elena qucağında olub.
İllər sonra ortaya çıxan qeyd...

Karlın ölümündən illər sonra onun evinə gələn inşaat işçilərinin dediklərinə görə, evdə qeyd tapıblar. Karla aid olduğu güman edilən qeyddə belə yazılmışdı: "Elena ona bu ləzzətli zəhəri hazırladığım üçün öldü. Sevgilim 1931-ci il oktyabrın 25-də bu səfil dünyanı tərk etdi. Daha əziyyət çəkməyə ehtiyac yoxdur, mənim şirin Elenam. "Mən səni öz əllərimlə mələklərin yanına göndərdim".

Tapılan bu qeydlə Elenanın ölümü ilə bağlı bəzi fərziyyələr irəli sürülüb.

Karl Elenanı öldürə bilərdimi? Qarşılıqsız sevgisinin qisasınımı almışdı? Bu kimi çoxlu suallar zamanla unudulsa da, dəyişən sualların arxasında dəyişməyən yeganə şey Elenanın bütün bunlara layiq olmaması idi. Həyatı ağır xəstəliklə başa çatdıqdan sonra yazıq qadın ölümlə belə rahatlıq tapa bilməyib.